Oksford

Səhər tezdən hər kəs çantalarını da götürüb, qatara çatmaq üçün yola düşdü. Hər iki ailə də birlikdə gedirdi. Uşaqlar hələ də hansı şəhərə gedəcəklərini bilmirdilər.
- Ata, hansı şəhərə gedəcəyimiz de də nə olar? - Karl səbirsiz baxışlarla atasına baxaraq dedi.
- Yox, yolda özünüz hansı şəhərə gedəcəyimizi təxmin edərsiniz. Çox bəyənəcəyiniz bir şəhərdir.
Beləcə, yol boyu uşaqlar yenə müzakirə etməyə başladılar. Hamı öz fikrinin doğru olduğunu düşünürdü.
Nəhayət, qatar stansiyasına çatdılar. Tam vaxtında gəlmişdilər. Qatara mindilər. Qatar adamlarla dolu idi. Uşaqlar yer tapıb, birlikdə oturdular və səyahətin dadını çıxartmağa başladılar. Yolda onlar cürbəcür maraqlı yerlər gördülər.
- Uşaqlar, baxın, bu Temza çayı və vadisidir. Çox gözəl görünür. - Culia pəncərəyə yaxınlaşıb həyəcan və heyranlıqla dedi.
- Hə, haqqında eşitmişdim amma bu qədər gözəl ola biləcəyini təsəvvür etməmişdim. - Cek Temza çayının suyunun yaşılı rənginin ətrafdakı ağaclarla, yaşıllıqlarla - təbiətlə uygunlaşdığını görüb dedi.
- Ağ qu quşlarını görürsünüz? Necə də qəşəng üzürlər!- Karl təbiətin möcüzələri qarşısında Valeh olmuş halda dedi.
Yol boyu uşaqlar mənzərənin dadını çıxartdılar. Onlar yolda Temza çayı və vadisini, qədim ingilis evlərini və müxtəlif maraqlı heyvanlar gördülər. Qatarla təxmini 1 saatlıq yol getdilər və artıq şəhərə çatmışdılar. Qatardan düşməzdən əvvəl Karlın atası soruşdu:
- Deyin, görüm, qatarla səyahət necə idi? Xoşunuza gəldi?
- Əlbəttə, bəyəndik. Ən çox da Temza çayının təbiətlə uygunlaşmasını və gözəl ağ qu quşlarını bəyəndim.- Culia, Karl və Cekin danışmasına imkan verməyib həyəcanla dedi.
- Hə, indi deyin, görüm, bura hansı şəhərdir?
Culia yenə Karl və Cekin danışmasına imkan verməyib təəssüf hissi ilə dedi:
- yolda gördüklərimizə baxsaq, burası Kembric deyil.
- Bəli, Karlın təxmini doğrudur. Biz Oksforddayıq!
Karl xoşbəxtliklə atasını qucaqladı.
Culia və Cek istədikləri şəhərə gəlmədiklərini eşidəndə biraz kədərləndilər. Qardaşının da kədərləndiyini görüb Culia gülümsəyərək dedi:
- Cek, heç nə olmaz! Qabaqda bizi hələ çox macəralar gözləyir. Həm də ki, Oksford da maraqlı şəhərdir.
Cek gülümsəyərək bacısını qucaqladı və Karl da onlara qoşuldu. Üç dost bərk-bərk qucaqlaşdılar. Sükutu Karlın atası pozdu:
- uşaqlar, gəlin, otelimizə yerləşək. İş sabahdan başlayır. Mən də bu gün sizə şəhəri gəzdirərəm.
-Urraaaa!
Uşaqların sevinc qışqırdıqları Oksfordun hər tərəfinə yayıldı...